• Notifications
Kthehu
Lexime dhe dobi
18 Nëntor, 2026
2 min lexim

Kur përmbysjen e zemrës, nuk e hetojmë

Hoxhë Mirsim Maliçi

«Më ka ngjarë të arrijë diçka prej interesave të kësaj bote, por duke ndjekur disa lehtësime fetare, porse… Ja, ua them troç, sa herë që më vinte diçka e dynjasë nga kjo rrugë, unë pësoja humbje në zemrën time dhe, sa herë që më hapej udha për këto interesa, më shtohej errësira në zemër. E një herë i thashë vetës: o shpirt i lazdruar! A nuk e di që mëkati ta prangos zemrën, ndërkaq Profeti (sal-lallahu alejhi ve selem!) na ka thënë: “Pyete zemrën!?! E po, nuk ka hajr në dynjanë në tërësi, nëse ardhja e saj e përlyen zemrën, e madje, edhe xheneti nëse do të ishte fituar me diçka që e damkos dhe e cenon fetarinë, nuk do të kishte qenë i këndshëm. Të bësh gjumë në mbeturina, por me zemër të pastër e të pa përlyer, është më e këndshme sesa të flesh në kushte mbretëtore.» - Ibnu’l-Xheuzi, Sajdu’l-Hatir, f. 163


Madhështia e reflektimeve të dijetarëve, nuk është tek devotshmëria dhe zuhdi si përcaktime dhe ambicie të larta që sheshazi duken, por tek një vetëdije themeltare që çon tek këto qëllime fisnike: vetëdija për zemrën.

Të jesh i vetëdijshëm për zemrën do të thotë të jesh, të ekzistosh. Sikundërqë, një gaflet që e ka përjashtuar zemrën nga vëmendja, i ngjan vdekjes, pra, të mos jesh.

Pra, të flasësh për devotshmërinë e për zuhdin, e të tingëllosh që po lundron drejt ambicieve të larta imanore, por pa zemrën, pa tezkije, e pa stërvitje e pa kurim të zemrës, është të flasësh për mbjelljen, kultivimin e vaditjen, por pa një cope toke, pa një arë. E, vallë, ku do ta mbjellësh atë farë?!

Mirëpo, cila është përhumbja më e frikshme?! Të synosh diçka të madhe që nuk bëhet pa zemër, kurse gjendjet e zemrës nuk i vë re fare. Zemra errësohet, lodhet e përmbyset, por nuk e hetojmë. Zemra vuan, lëngon e përkeqësohet, por as që e ndiejmë. Zemra kalbet, ndryshket e kundërmon, por as që e nuhasim. E, vallë, si mund të kemi synime që kalojnë kah ura e zemrës, kurse zemrën s’e vëmë re?! Harruam që ajo ekziston!

Nuk është synimmadh ai që i ka ngulitur sytë drejt një porte suksesi, kurse çelësin që e ka me vete, e ka humbur përgjatë udhës. Çelësi është zemra, o synues i devotshmërisë!

Mirsim Maliçi

Shkup, 18.11.2026

Shpërndaje
Lexime dhe dobi

Atëherë kur “të jesh i dobishëm” nuk është e mjaftueshme

Lexo më shumë
Lexime dhe dobi

Kur mentori është, por s'është!

Lexo më shumë
Lexime dhe dobi

“...për ata nga ju që duan istikame.”

Lexo më shumë

Tags